Walay sparks

Dear Tito Miguel ,

Suki gyud ko sa Banat News. Ako  si Laureen, nagpuyo sa Liloan, Cebu ug nagtrabaho sa usa ka restaurant. Ang akong amo ba, sige man og diskarte nako. Same baya mi nga single, pero wala gyud koy sparks niya. Dili siya ang akong type nga lalaki kay medyo artehon man gud siya og dating. Unsaon nako siya pagprangka nga dili siya tantong masakitan? Maikog bitaw ko. Salamat kaayo Tito Miguel . —Laureen

Laureen,

Unsa may imong pasabot sa diskarte, klaro nga nanguyab nimo o nagparamdam lang? Kay kun igo ra nagparamdam, basin sab nagdahom lang ka. Dili kaha natural ra niya nga friendly o sweet sa mga babaye? Siguroha usa kay basin mobalibad ka sa wala. Kun iya na gipamulong nga nakagusto siya nimo, nga gusto niya magkarelasyon mo, diha na ka mobalibad sa klaro. Sugdi sa pagsulti nga taas imong respeto kaniya isip amo ug wala nimo makita nga mahimo ninyo usbon inyong relasyon. Lagmit mahagit, mopasalig nga dili babag kun unsa mo sa opisina sa inyong personal nga relasyon.

Ingna usa ra na sa mga rason, apan ang ma’s bug-at kay maski tan-aw nimo maayo siya nga tawo, hitsuraan ug kasaligan, dili siya ang imong gipangita. Sa maong paagi dili siya tantong malain kay nagsugod ka sa unsay positibo niya. Pero kinahanglan sinsero ka, ang tinuod ang isulti. Kun dili guwapo, ingna lang sigurado ka dunay mga babaye nga ganahan niya, apan lagi dili siya ang imong gipangita. Kun mohagit ug moingon wa man diay kay nakita nga sayop kaniya, unsay problema ngano dili mahimong kamo? Ingna nga mura ra gud siya’g sud-an nga paborito sa uban, apan dili ang imong gipangita. Kun moingon nganong dili nimo siya tilawan, ingna kay para nimo ang relasyon dili ipaagi sa tilaw-tilaw, kay dili kini tiaw-tiaw.   Tito Miguel

Magpatambag ka? Ipada kang Tito Miguel: 0998-581-5856