Reporma sa tax laws

Sa ikaduha nga State of the Nation Address ( SONA ) ni Presidente Ferdinand “Bongbong” Marcos Jr. niadtong Lunes, Hulyo 24, 2023, iyang giawhag ang Kongreso sa pagpalabang sa balaud nga nagpunting sa pag-usab sa balaud sa buhis dinhi sa nasud.

Gipasabot sa Presidente nga ang pag-usab sa balaud sa buhis gikinahanglan nga mapalabang aron mahimo nga progresibo ang nasud.

Ang balaud sa buhis nga gustong usbon sa Presidente ubos sa medium-term fiscal framework mao ang excise tax sa single use plastics, Value Added Tax (VAT) sa digital services, rationalization sa mining fiscal regime, motor vehicle users charge, military ug uniformed personnel pension, pag-usab sa Fisheries Code, pag-usab sa anti-agricultural smuggling act, pag usab sa cooperative code, bago nga government procurement law, bago nga government auditing code, anti-financial account scamming, Tatak Pinoy law, ang blue economy law, ease of paying taxes, local government unit income classification ug ang Philippine Immigration Act.

Pipila niining maong mga balaudnon wala pa makaabot sa kataposang pagbasa sa Senado ug sa Ubos Balay Balauranan.

Ang pag usab sa balaud sa buhis nga giduso ni Presidente Bongbong Marcos daghan og epekto ug una nga maapiktohan niini mao ang bulsa sa mga magbubuhis.

Pero kun maghisgot na gani og buhis wala g'yud tay dag-anan tungod kay mosugot man ta ug sa dili mohatag gyod ta og buhis gumikan kay ang buhis dugo ug kinabuhi sa gobiyerno.

Ang gobiyerno sama sa atong pamilya. Kun si papa ug mama walay salapi, dili sila makahatag sa panginahanglan sa ilang mga anak. Dili sila makapalit sa saktong pagkaon, sapot, maayong edukasyon ug uban pa.

Sa buhis, ang atong mahimo mao ra gyod ang pagreklamo ug pagbagulbol sa pangayoon nga buhis. Ang konsuwelo lang nato mao ang pagpaningil sa gobiyerno sa maayong serbisyo nga maoy bugti sa buhis nga atong gihatag sa gobiyerno.