Naliog sa ulog-ulog

Di makalalis ang Department of Agriculture (DA) sa saad ni Presidente Ferdinand Marcos Jr. sa P20 kada kilo nga bugas humay. Moligid ang ulo ni bisan kinsa nga opisyal sa DA nga mangahas sa pagsukwahi sa presidente.

Kay hapit tanan nga dunay ideya sa negosyo sa bugas nakahibawo: Nga bugtong paagi sa pagtuman sa saad mao ang pagtipak gikan sa tinuig nga budget og labing menos P280 bilyones isip subsidy. Nga tungod sa kaapiki sa nasudnong panudlanan, di mahimo sa administrasyon. Sa way pag-inutil sa batakang mga serbisyo ug pagbangkarota sa gobyerno.

* * *

Pero makahimo ang mga opisyal sa DA sa pagpasumbingay sa tinuod nilang sentimiyento. Sama sa gihimo ni DA Undersecretary Mercedita Sombilla. Kinsa niinsistir nga posible gihapon nga mapatuman ang saad sa presidente kon:

• Di na maapektahan ang mga mag-uuma sa kataas sa presyo sa mga produkto sa lana ug sa abuno;

• Di na mameligro ang suplay sa tubig sa nasud, labi na ang irigasyon sa mga umahanan, sa hulga sa El Niño; ug

• Di na maggusbat ang mga umahan sa mga bagyo ug uban nga mga katalagman.

* * *

Sama ra nga niingon si Sombilla nga mahimo lang P20 kada kilo ang bugas humay kon ang adlaw di na mosidlak sa silangan ug di na mosawop sa kasadpan. Kay:

• Di mahimong mobuwag sa planeta ang Pilipinas aron di maigo sa pagsaka sa presyo sa lana ug abuno tungod sa gubat sa Ukraine ug ubang kalibotanong mga hulga;

• Wa pay teknolohiyang makasagang sa pagsaka sa temperatura ug makapugong sa paghubas sa mga tinubdan sa tubig matag panghasi sa El Niño; ug

• Bisang labing abanteng artificial intelligence di makapahungaw sa bagyo, linog ug pag-ulbo sa bulkan.

* * *

Hinaut nga di magpatid-patid og lata sa Colon si Sombilla. Kon makasabot na si Marcos sa iyang ulog-ulog. Hinaot nga ang mga naglibot sa Malakanyang mohunong na pag-abiba ug mosugod na pagkurihir pagbalikbalik sa uban pang pamakak:

• Atong ekonomiya di maoy kinapaspasan og tubo sa kalibotan ug bisan sa Asya ug Pasipiko; ug

• Paghinay sa inflation rate sa nangaging mga buwan wa magpasabot nga niubos nang presyo sa mga palaliton kon dili padayon nga nisaka pero di na lang sama kapaspas.

* * *

[email protected]