May benepisyo ang nag-resigned nga polis?

Gipatuman na sa liderato sa nasudnong kapolisan ang pagluwat sa 18 ka mga opisyal sa kapolisan human dawata ni President Ferdinand “Bongbong” Marcos Jr. ang ilang resignation. Mao kini ang gipahibawo sa hepe sa kapolisan sa nasudnong kapolisan nga si Benjamin Acorda Jr. niadtong Lunes, Hulyo 31, 2023.

Kining maong mga opisyal kabahin sa 900 ka mga full pledge nga colonel ug heneral sa kapolisan nga gipasumitir sa ilang courtesy resignation ni Department of Interior and Local Government (DILG) Secretary Benhur Abalos Jr. tungod sa giingong pagkalambigit sa kapolisan sa 990 ka kilo nga shabu nga nagkantidad og P6.7 bilyones ug sa pagkasikop sa polis nga si Master Sergeant Rodolfo Mayo Jr.

Apan giklaro ni PNP Chief Acorda nga ang mga nang-resigned nga polis kansang resignation gidawat ni Presidente Bongbong Marcos makadawat gihapon sa pipila nila ka mga benepisyo sa pagka polis.

Giklaro usab ni Acorda nga puwede ra pod nga makaapilar sila sa ilang resignation nga gidawat apan sa pagkakaron hulipan una sila sa ilang gibakante nga position. Puwede ra seguro nga makaapilar ang mga polis opisyal sa ilang resignation nga gidawat sa presidente pero dili puwede nga padawaton gihapon sila sa ilang benepisyo sa pagka polis.

Ang presidente daghan og tigpaniid. Aduna siyay dako nga gahin sa pundo sa pagpaniid. Anaa kaniya ang lapad nga sirkulasyon sa mga tigpaniid busa maingon nato nga lig-on ang iyang basihanan sa pagdawat sa courtesy resignation sa 18 ka mga opisyal sa kapolisan. Tungod niini dili puwede nga ang mga nang-resigned nga opisyal sa kapolisan hatagan sa ilang mga benepisyo.

Ang paghatag kanila sa ilang pipila ka mga benepisyo sama ra kini sa paghatag og reward sa mga badlongon nga polis. Dili kini maayo nga sumbanan.