Mag-uyab nga nanulis nasikop sa kapolisan

CEBU, Philippines — Nailhan na kapolisan sa Labangon Police Station 10 ang riding in tandem nga giingong mag-uyab nga nanulis niadtong Domingo diha sa Enriquez Compound, Barangay Punta Princesa, Siyudad sa Sugbo.

Ang mga suspetsado mao si Jezer Setosta Banzon, 43-anyos, molupyo sa Barangay Quiot ug ang babaye nailhan sa ngalan nga “Ericka”.

Matud ni Police Major Angelito Valleser, hepe sa Labangon Police Station 10 nga ang biktima nga si Bryan Labrador, hingkod ang panuigon, residente sa Barangay Punta Princesa sa wala pa mahitabo ang insidente sa pagpanulis niadto kini og dental clinic aron magpaibot unta sa ngipon.  Giingong nahutdan og priority number ang unang dental clinic nga giduol sa biktima hinungdan nga nangita kini og lain apan sirado ang ikaduhang dental clinic nga giadtoan sa biktima hinungdan nga nibalik kini aron mopauli.

Sakay sa e-bike paingon sa Enriquez Compound diin igo lang nakaabot sa maong dapit kalit lang nga gikapkapan sa suspetsado ang biktima ug gikuha ang cellphone ug bag niini nga adunay sulod nga P4,900.

Si Banzon nailhan tungod kay ilado kini nga maldito ug identified usab ang motorsiklo nga gigamit sa pagpanulis ug positibo siya nga gitudlo sa kolektor.

Samtang si Ericka giingong aduna usab kini uyab nga drug personality nga nabilanggo sa Labangon Police Station 10 ug tigduawan kini sa police station hinungdan nga nakaila ang mga polis ug nasayran nga siya ang angkas nga babaye.  (BANAT NEWS)