Klase bisan magbagyo
Laing timaan nga si Bise Presidente ug Education Secretary Sara Duterte Carpio wa kasabot sa iyang trabaho: Nisugo siya nga di angay nga maputol ang mga klase sa mga dapit nga maigo sa katalagman; face-to-face classes ra ang suspensuhon pero ipadayon ang online classes o modular learning.
Sa mabaw nga pagtan-aw, nindot ang tuyo ni Carpio. Di tuod angay nga dugangan ang kadaot sa katalagman pinaagi sa pagsakripisyo sa pagtuon sa mga estudyante. Pero sa mas lawom nga pakisusi, mabantang nga si Carpio wa katugkad sa implikasyon sa iyang gipanulti.
* * *
Nakaseguro ko nga dihang naigo sa nangaging mga bagyo ug baha ang Davao City sa siya pa ang mayor o bise mayor, nahibawo siya nga dunay kabalayan nga naggusbat sa bagyo o gianod sa baha, naputol ang mga koneksiyon sa tubig, kuryente, komunikasyon, ug kinahanglang pabakweton ang naapiking mga pamilya ngadto sa mas luwas nga mga lugar.
Unsaon man paghimo ang online classes kon way kuryente ug way signal? Unsaon man pagbasa, pagtuon ug pagtubag sa mga estudyante sa modules samtang nagpunsisok sa ngiob ug alimuot nga evacuation centers?
* * *
Kon tumanon sa Departmentamento sa Edukasyon (DepEd) ang sugo ni Carpio, mapugos sa pagsungasong ang mga magtutudlo sa bagyo, biniyaan ang mga sakop sa ilang pamilya nga nabalaka sab makalahutay ba ang ilang pinuy-anan, aron pag-apud-apod sa modules sa ilang mga estudyante.
Taliwa sa naghagiyos nga hangin ug bunok sa uwan, nakit-an sa usa ka magtutudlo ang iyang estudyante sa tungatunga sa niawas nga suba, nagkupot sa haligi sa taytayan nga mao na lay wa mabanlas. Nagdali ang magtutudlo pag-itsa sa module ngadto sa bata aron di mabalda ang iyang pagtuon.
* * *
Nagsige og patuo si Carpio sa iyang determinasyon sa pagpalambo sa sistema sa edukasyon. Nangayo og confidential ug intelligence funds aron mas kapanalipdan ang mga bata ug mga magtutudlo. Ni-resign gikan sa Lakas-CMD aron makatingob sa panahon pagtuman sa iyang trabaho.
Hinaot nga molampos sa iyang tahas. Pero angayng pahinumdoman nga ang iyang dakong gahom ug taas nga popularidad wa mohatag niya og lisensiya sa pagpamugos sa iyang hiktin nga panglantaw ug taphaw nga liderato taliwa sa grabeng krisis sa edukasyon.
* * *
- Latest
