Kasal sa church the best

Makapatandog ang balita nga may seremonyas unta sa kasal nga himoon niadtong Hulyo 26, 2023 didto sa siyudad sa Carcar, pero tungod kay maoy gipalabi sa solemnizing officer nga mayor ang pagtambong sa ikaduhang State of the Nation Address (SONA) ni Presidente Ferdinand ‘Bongbong’ R. Marcos Jr. (PBBM), gikanselar ang maong seremonyas sa kaminyoon.

Tiaw bay, usa ka tuig kunong paningkamot sa kaslonon nga magtigom para ning maong adlaw, unya pag-abot niini, kabawo ray ilang naani. Atrasawo na ang pagpahibalo sa City Hall nga walay mayor mokasal nila. Ang pait, kay preparasyon gikan sa imbitasiyon ngadto sa reception, tanan naka-set na.

Hinungdan, wala man tuod mahinayon ang kasal. Pero ang tsibogan nadayon! Hinuon, kinasingkasing nangayog pasaylo ang mayor sa kaslonon ug usab sa ilang mga kabanay.

Unya nakahukom nga kaslon na gyod sila ning umaabot Agosto 1, 2023, diin ang mayor misaad nga siyay bahala sa wedding reception.

Hisabtan sa kaslonon ang sitwasyon sa mayor ug gikalipay nila ang paagi niini kon giunsa pagpalig-on ang hapit maputol nilang maayong relasyon.

Sa matag panghitabo sa kinabuhi, may iyaiyang rason ang nagpahipi. Sama niining wala mahinayong kasal sa giktakdang adlaw. May mensahe nga gustong ipaabot sa Ginoo ngadto kanila.

Kaya man diay nila ang pagtigom para sa kasal, nganong wala na man lang sila molahos pagpakasal sa simbahan?

Dili ba mas sagrado ang simbahan kay sa City Hall? Masinati pa gyod nato ang ka-solemne sa misa diha sa atong pagtuman sa Sakramento sa Kaminyoon atubangan sa Iyang altar.

Ning pagtanyag sa mayor nga siyay moangkon sa wedding reception, naghatag kini'g dakong kahigayonan sa kaslonon paghangyo sa mayor nga kon puwede, sa simbahan na lang sila kasla ug himuon nilang ninong ang mayor. Mosugot kaha?

Walay imposible nga dili mahimong posible sa gahom sa Diyos. Segun sa akong nasayran, diyosnon ang pamilya sa mayor. Aktibo sila sa mga apostolikanhong kalihokan. Ug dili sila makabalibad kon ang Ginoo, pinaagi sa imahe sa nanginahanglan mao nay mohangyo. Labi na, kay sila nasayod nga ang kasal sa simbahan maoy the best sa mga mata sa Kahitas-an. Segurado gayod nga andam silang motabang.

Kana, kon maoy pangandoy sa kaslonon?