Kalihokan sa World Youth Day nasinate usab dinhi sa Sugbo

CEBU, Philippines — Mga kalihukan sa World Youth Day sa Lisbon Portugal nga gisugdan sa adlaw nga Martes ang nasinati usab sa kabatan-onan dinhi sa Archdiocese of Cebu.

August 1, 2023 gibuksan ang WYD 2023 sa Portugal, diin susama usab dinhi sa Sugbo gipahigayon ang Taize Prayer sulod sa Cebu Metropolitan Cathedral.

Kagahapon adlaw nga Miyerkules gipahigayon ang Holy Hour sa National Shrine of St. Joseph Mandaue City.

Samtang karong adlawa Huwebes ipahigayon ang WYD 2023 Motorcade uban sa icons sa Local World Youth Day Cross ug Our Lady of Salus Populi nga motuyok sa SRP ngadto na sa CCLEX, Virgen De Regla, Mandaue dayon sa Archdiocesan Shrine of San Pedro Calungsod.

Sa adlaw nga Biyernes ipahigayon ang Via Crucis sa seminario mayor de dan carlos, samtang sa Sabado ang Lakaw panaw uban ni Maria Fatima Experience gikan sa San Carlos Seminary ngadto na sa Carmelite Monastery.

Sa Domingo mao na ang pagtak-op sa maong kalihukan sa WYD2023 Lisbon diin dinhi ipahibalo asa na usab ang sunod nga World Youth Day, samtang dinhi sa Archdiocese of Cebu dinhi usab ipahibalo kung asa na ang sunod nga Local World Youth Day.

Samtang dili pa usab dugay nahuman ang Parish Youth Day sa Parokya sa Tuyan sa Dakbayan sa Naga, nga gitambongan ug dili mominos sa 468 ka mga pilgrims.

Matud pa ni Yries John Repollo, Adviser sa Tuyan Parish Youth Coordinating Council, atol sa maong tigum ilang gituki ang kabahin sa mental health awareness.

Nahimong malamposon ang kalihukan nga gihimo niadtong Hulyo 28-30, 2023 diin mapasalamaton sila sa tanang mga batan-on nga niapil. (BANAT NEWS)