Kahamtong sa pangisip

Alang kang Senador Alan Peter Cayetano, ang dili pagpadangat sa isyu kabahin sa pagpanulong sa China diha sa West Philippine Sea (WPS) ngadto sa United Nations General Assembly (UNGA) usa ka senyales sa kahamtong sa panghunahuna ug dili sa kahuyang. Supak si Cayetano sa sugyot nga mopalabang ang Senado og resolution nga mag-awhag sa DFA paghimo’g panawagan sa UNGA nga ipahunong sa China ang ilang pagpang-harass sa mga Pilipinong mananagat. Ginaingon bitaw nga, “Usahay ang suliran wala magkinahanglan og hinanali’ng sulbad. Hinunoa, nagkinahanglan lang kini’g kahamtong sa pangisip aron kini malampasan.” Tumpak ganeern!

Paibogon o hadlokon lang

Matud pa ni AFP Chief of Sta' Gen. Romeo Brawner Jr., buot ang China mohimo og joint military exercise sa Pilipinas. Misumite ang China og “white paper” kabahin sa maong tanyag ug gitun-an pa kini pag-ayo sa AFP. Angayan tun-an gyud pag-ayo tungod kay aduna baya kita’y panagbangi sa China kabahin sa teritoryo sa South China Sea. Sa panglantaw sa akong higala, walay tataw nga maani ang China sa maong joint military exercise. Busa nagtoo siya nga tuyo lang sa China nga paibogon o ba kaha hadlokon lang kita sa kadagko ug kadaghan sa ilang mga himan alang sa gubat. Fezteleern!

Bugti sa pagpasi-ugda

Gihulagway ni Presidente Marcos ang business sector nga maoy “labing agresibo nga ahente sa kausaban” dungan ang panawagan sa panagtambayayong tali sa kagamhanan ug sa pribadong sektor aron mapadayon ang paglambo sa ekonomiya ug mapatuman ang mga responsableng pamaagi sa patigayon. Daghan tinuod ang mahimong kalambuan ug kausaban kon ang pribadong sektor ang mangulo. Apan atong klarohon nga mahitabo lang ang tiunay nga kalambuan ug kausaban kon magtinarong usab ang mga magpapatigayon. Kay ginaingon baya nga “Walay magpapatigayon nga modasig o mopasiugda og kalihokan kon wala’y kwarta nga bugti niini.” Madahaan!

Pakan-on dayon pagutman

Mipasidaan si kanhi Agriculture Undersecretary Fermin Adriano sa posibleng pagsaka sa kalibutanon’g presyo sa bugas tungod sa desisyon sa nasud nga India pag-imponer og export ban sa ilang produkto’ng bugas. Gitoohan nga ang import ban moresulta sa spekulasyon nga pagabuhaton sa mga magpapatigayon. Food su1ciency unta ang tubag sa maong suliran pinaagi sa pagpalambo sa atong agrikultura. Apan wala pa kini masulbad sa kagamhanan. Ni’ng kahimtanga, tinuod ang panultihon nga, “Kon magsalig ka sa uban nga pakan-on ka, gihatagan mo usab sila’g kagahum nga pagutman ka”. Muleeeng!

Mahinungdanon ang kaluwasan

Ubos sa bag-ong guidelines nga giluwatan sa DepEd, sa panahon nga adunay katalagman, sama sa bagyo, kusog nga pagbunok sa ulan, pagbaha o linog, ang  pagkansela sa klase nagpasabot lang sa face-to-face o in-person classes. Apan padayon gihapon ang “pag-eskwela” diha sa panimalay ginamit ang uban’g alternative delivery modes. Bisan diay kon hapit na maanod sa baha o nanglupad na ang atop sa balay, o ba kaha, wala na’y kuryente, magsige lang gihapon og tubag sa modules ang estudyante. Sa panahon sa katalagman, dili ba mas mahinungdanon ang kaluwasan sa katawhan? Pagkatoytoy!