Importasyon ra'y solusyon

Naglaraw na usab ang kagamhanan nga moangkat og balor 1.3 milyon metriko tonelada nga bugas luyo sa kahingawa sa Presidente sa mahimong epekto ngadto sa atong suplay sa bugas sa bagyong Egay, El Niño phenomenon ug ang pag-withdraw sa Russia gikan sa Black Sea Grain Initiative. Importasyon ra ba gayud ang labing dali nga solusyon nga mahunahunaan sa kagamhanan? Ni’ng kahimtanga, mora’g mouyon na lang ko sa sugyot sa akong amigo nga “Atong ipadayon ang laraw nga pag-import sa bugas apan idungan usab nato ang pag-export sa atong mga opisyales sa Department of Agriculture.” Madahaaan!

‘Mangtas nga ungo’

Mopahigayon ang DepEd-7 og kaugalingon’g imbestigasyon batok sa magtutudlo nga giakusar nga namolestiya sa duha ka tinun-ang babaye didto sa Carcar City. Ang maong administrative investigation mahimong basehan sa pagtaktak sa katungdanan sa magtutudlo kon mapamatud-an nga siya sad-an. Sakit nga kamatuoran kini nga panghitabo. Gihulagway man unta nga ang mga tulonghaan usa ka edipisyo diin anaa ang “kaugmaon” sa sulod. Apan tungod sa maong panghitabo, maingon nato nga “mangtas nga ungo” diay ang sulod niini. Tinuod ang panultihon nga, “Ang pag-abusar sa kabataan nagtandang og landong o anino nga sama kataas sa tibuok kinabuhi.” Muleeng!

Walay matinud-anon

Gipaubos sa imbestigasyon ang duha ka airport polis tungod sa ilang kapakyas pag-uli sa nakapalagan nila nga pitaka didto sa NAIA nga gipanag-iya sa usa ka biyahero gikan sa Bangkok, Thailand. Nakita sa CCTV footage nga gigunit-gunitan sa maong duha ka polis ang pitaka sa biyahedor. Makapahinumdum kining panghitabo sa linya sa awit nga nagkananayon, “Honesty is such a lonely word. Everyone is so untrue”. Adunay kamatuoran ang pagya-komedya nga “Ang pagkamatinud-anon maoy labing maayong polisiya – labi na kon adunay kwarta nga nalambigit niini.” Fezteleeern!

“Imong sud-an, akong kan-on”

Gitugtan na karon ang mga inmates sa New Bilibid Prison (NBP) sa Muntinlupa City nga mahatdan og pagkaon pinaagi sa online delivery application. Ang pag-order sa pagkaon pagabuhaton sa ilang kabanay. Gitugot sa NBP ang maong sistema tungod kay ang 70 pesos nga budget sa pagkaon matag adlaw dili man paigo sa tulo ka kan-anan. Maanindot kining maong innovation sa NBP. Manghinaut lang kita nga fool proof ang sistema sa paghatud sa pagkaon aron maseguro nga ang gipadalhan nga inmate mao gayod ang makadawat ug makakaon. Kay kon dili, matinuod gyud ang pagya nga “Imong sud-an, akong kan-on.” Pagkatuytoy!

Molansad na lang

Nasayran sa MARINA nga si Donald Anain, ang kapitan sa nalunod nga motor banca nga Aya Express wala diay maghupot og balido nga Boat Captain 1 license. Tungod niini, mag-atubang og kaso’g administratiba ang maong kapitan sa banca. Dili na matuis ang maong kamatuoran sa ka-walay lisensya busa makuli na nga makabalik ang kapitan sa iyang naandan nga trabaho. Apan kon buot si Anain nga magkapitan pa gihapon bisan walay lisensya, mahimo hinoon siyang modagan sa maong katungdanan karon umaabot barangay elections sa Oktobre ning tuiga. Basin na lang palaron. Fishkots!