Ihatag ang kagawasan

Dear Tito Miguel,

Ako diay si Freska, taga Minglanilla, Cebu. Ang problema nako kay akong boyfriend ba kay mopadulong na moladlad. Nahadlok ko basin biyaan nako niya ba. Ako raman siyang madawat, dili mawala akong love niya bisan moladlad pa siya. Unsa akong buhaton Tito Miguel, mangandam nalang ko daan mga biyaan gihapon ko niya ? — Freska

Freska,

Imong uyab nakahukom pagladlad aron siya makalingkawas gikan sa pagtago sa iyang tinuod nga pagkatawo. Dili ba kaha aron sab siya makalingkawas gikan nimo? Wala’y punto’g katuyoan kun igo ra siya mo-anunsiyo sa iyang pagkatawo unya magpabilin diay nimo.

Lagmit mangatarungan ka nga gusto lang siya magmatinud-anon sa iyang kaugalingon. Posible, apan asa man ka niya ibutang human niya ipasigarbo nga lalaki iyang gusto? Hunahunaa’g maayo kay lagmit mao na iyang pamaagi pakigbuwag nimo. Kun tiunay nimo siya nga gimahal, ihatag kaniya ang kagawasan. Ingna dili ka mopugong sa iyang pagladlad, apan pangutan-a unsay mahitabo sa inyong relasyon, iya ba ni ipadayon o undangon. Ipasalig nga kun unsa iyang desisyon, imong dawaton. Tinuod, sakit kun mobiya na siya kanimo. Apan sa sugod ra na, agwantaha lang. Kay kun ikaw mopadayon, wala kay kalinaw, dili ka magmalipayon. Kun duna siya'y kuyog nga lalaki, maguol dayon ka kun iya ba kini higala o hinigugma. Wala’y garantiya nga dili ka niya biyaan. Mobiya man gani ang lalaki sa babaye nga maoy iyang gipangita, unsa na lang kaha ang lalaki nga ang gipangita sama ra sab niya nga lalaki? Ayaw na pangandam kun mobiya ba siya nimo, atubanga ang kamatuoran. Tito Miguel

Magpatambag ka? Ipada kang Tito Miguel: 0998-581-5856