Ginang pinasok, kinatay ng kawatan
BAGUIO CITY , Philippines — Patay na at naliligo sa kanyang sariling dugo ang isang ginang nang matagpuan sa loob ng kanilang tahanan na hinihinalang pinasok ng isang magnanakaw sa lungsod na ito nitong Martes ng umaga.
Kinilala ng pulisya ang biktima na si Floradel Ucab De Mesa, 39-anyos, tubong Masbate.
Ang biktima ay natagpuan ng kanyang anak sa kanilang bahay sa Purok 8, Sampaguita Site, San Luis Extension, San Luis, ng nasabing lungsod.
Ang pag kakadiskubre sa biktima ay inireport sa mga pulis ng Station 1 dakong alas-6 ng umaga ng nasabing araw.
Ayon kay Baguio City Police Station 1 commander Major Dencio Dayao, matapos na dumating ang anak ng biktima sa kanilang bahay mula sa ospital, nakita niya ang ina na naliligo na sa dugo at tadtad ng saksak sa katawan.
Sa imbestigasyon ng pulisya, nawawala na ang pera ng biktima na nagkakahalaga ng P100,000 kabilang ang pera sa loob ng kanyang piggy bank o alkansya.
Lumalabas na kasama ng biktima ang kanyang 3-anyos na anak nang maganap ang insidente subalit iniwan ang bata na hindi nasaktan.
- Latest