Falcon nagkaanam og kusog

CEBU, Philippines — Nagkakusog ang Severe Tropical Storm Falcon (international name: Khanun) samtang kini naglawig sa Philippine Sea kagahapon sa hapon sumala pa sa PAGASA.

Matud pa sa PAGASA nikusog ang hangin ni Falcon ngadto sa 110 kilometro kada oras duol sa tunga ug haguros nga 135 kph.

Nag-irog kini padung sa amihanan sa gipaspasong 20 kph sa 1,170 kilometro sidlakang bahin sa Northern Luzon.

Tungod sa dala niining uwan, nameligrong bahaon og balik ug modahili nasab ang mga lugar nga bag-ohay lang sab gikusokuso sa bagyong Egay (international name: Doksuri) nga hangtud karon wala pa makabangon gikan sa kadaut.

Ang bagyong Egay nga gisamotan sa epekto sa hanging habagat nakaapektar sa gibanabanang usa ka milyong Pilipino ug 16 ang nakalas sa miaging semana.

Sumala pa sa PAGASA, mosamot ang epekto sa hanging habagat tungod gihapon ni Falcon  ilabi na sa kasadpang bahin sa Luzon ug Visayas sa mosunod nga tulo ka adlaw.

Tungod niini, subling mipasidaan ang PAGASA sa tanan nga magmatngon sa pagbaha ug pagdahili sa yuta.

Ang Falcon nagpakita nga magkakusog kini sa mosunod nga tulo ka adlaw ug may posibilidad nga maporma kining bagyo kagabii (Domingo) o ba kaha karong sayo sa buntag, gipaabot nga mogawas kini sa Philippine Area of Responsibility unyang gabii o ba kaha ugma sayo sa buntag.—IBM (BANAT NEWS)