EDITORYAL - Unang politikong terorista

Gideklarar nga terorista sa Anti-Terrorism Council si Negros Oriental Representative Arnolfo Teves tungod sa alegasyong siya maoy utok sa pagpapatay kang anhing gobernador Roel Degamo ug laing siyam ka tawo pipila ka buwan na ang nakalabay.

Si Teves pa maoy labing unang politiko sa nasud nga nadeklarar nga usa ka terorista. Gawas kaniya, hasta iyang igsuon nga si Pryde Henry ug ang gialegar nga bagman nga si Marvin Miranda.

Duna pay laing napulo ka mga indibidwal nga giingong miyembro sa gitawag karon sa mga otoridad og Teves Terror Group ang gibansagan na sab nga mga terorista tungod sa ilang kalambigitan sa mga krimen nga nangahitabo sa ilang lugar.

Si Teves kinsa toa nagtago sa abroad padayong miinsister nga inosente sa pagpatay kang Degamo. Si Degamo ang kaatbang sa igsuon ni Teves nga si Pryde Henry sa nakalabay nga gubernatorial race, una niini, si Pryde Henry ang gideklarar sa Comelec nga nidaog apan paghuman sa electoral protest ni Degamo, gipakanaog si Pryde ug gipuli si Degamo.

Tungod sab sa deklarasyon sa ATC,  ang Anti-Money Laundering Council makasugod na pagimbestigar, paglili ug pag freeze sa financial assets ug kabtangan sa mga Teves ug ang tanang gihinganlang sakop sa Teves Terror Group.

Matud pa sa ATC ug ni Justice Secretary Jesus Crispin Remulla, si Teves ug ang mga ginsakupan nakalapas sa mga probisyon sa Anti-Terrorism Act tungod ang ilang mga gipanghimo naka “terrorize” sa katawhan sa Negros Oriental Wala pay warrant of arrest nga gipagawas batok kang Teves sa nahitabo kang Degamo, apan ang pagdeklarar kaniya ug sa iyang grupo ug sa ilang binuhatan nga gikonsiderar nga terorismo, magsilbi untang leksyon sa tanan ilabi na sa uban pang mga politiko.

Kay pagkatinuod, daghan pang mga politiko ang dunay mga goons, ang uban sa ilang mga sakop aktibo pang mga polis ug sundalo nga gigamit sa pagpanhadlok sa mga kaatbang ug ilang supporters.

Kun kini makonsiderar nga “terorismo”, sa ato pa, daghan pa unyang politiko ang mosunod kang Teves sa umaabot nga adlaw. Kana kun dili masagolan og bulok pamolitika.