EDITORYAL - Balik drugas gihapon ang uban

Subsob ang kampanya sa gobiyerno batok sa illegal nga drugas. Daghang mga gibuhat gikan sa hugot nga pagpatuman sa balaod o law enforcement hangtud na sa paninguhang ma-rehabilitate ang mga drug users ug mabalik sila sa komunidad.

Sa nakalabay nga administrasyon, ang kampanya batok illegal nga drugas gigamitan og kusog, miresulta kini sa daghang nangamatay nga mga gidudahang nalambigit sa illegal nga drugas. Apan napagan ang due process tungod sa matud dili makatarunganong pagkamatay sa mga drug suspects atol sa mga anti-drug operations.

Hinuon, duna gihapoy gihimo ang administrasyong Duterte pagsalbar sa mga gustong mag-usab pinaagi sa pagsuporta anang mga community-based drug rehabilitation programs partikular sa mga barangay.

Apan ang dugoong kampanya kaniadto nakapaipit sa sitwasyon sa gobiyerno ubos kang Presidente Ferdinand Marcos Jr. kabahin sa kasong gisang-at diha sa International Criminal Court batok kang Duterte ug mga opisyales sa iyang panahon.

Ang administrasyong Marcos daan ng miangkon nga daghang lapso ug naabusar gyud ang war on drugs sa nakalabay nga administrasyon apan nagdumili siya pagtugot sa ICC nga padayunon ilang imbestigasyon bahin niini samtang siya pay presidente sa nasud karon.

Karon ang direksyon sa war on drugs ubos sa iyang renda, motutok sa rehabilitasyon sa mga drug users kadungan sa kampanya sa law enforcement ug paggukod niadtong mga naa sa gobiyerno nga nalambigit sa illegal drug trade.

Apan nasayran nga bisan kadtong mga naka-graduate na sa community-based drug rehabilitation programs, duna gihapoy namalik sa illegal nga drugas, dili lang sa paggamit, kondili sa pagpamaligya na sab niini.

Kuwang ba sa pag-monitor kining mga kanhi drug personalities? Kang kinsa man kin inga lapso, sa barangay, sa kapolisan? Ang uban man gud kanila, human naka-graduate, wala may nakitang kapanginabuhian.

Tingali maayong pun-an pa ang mga programa, gawas sa rehabilitasyon, tudloan sila og dugang livelihood skills nga ilang masaligan.