"BarDa " suportado ni Jak

CEBU, Philippines — Giklaro ni Jak Roberto nga nakasabot ra siya sa trabaho sa iyang uyab nga si Barbie Forteza sanglit susama sila nga artista busa wala gyud nahitabo nga giselosan niya ang aktor nga si David Licauco.

Matud pa niya nga nakasuporta siya sa kusog nga tandem nila nila ni Barbie ug David nga gitawag karon og BarDa.

Malipayon si Jak alang sa kalamposan sa career sa iyang girlfriend.

Kahinumdoman nga ni-click ang BarDa kaniadto sa primetime series sa  GMA-7 nga   Maria Clara at Ibarra.

Subli sila nga magpares sa  upcoming TV adaptation sa  1991 movie nga Maging Sino Ka Man.

Walo ka anak ang target

Gibutyag ni Bea Alonzo nga  gusto sa iyang hinigugma nga si Dominic Roque nga  makabaton sila og walo ka anak.

Apan dili maseguro ni Bea nga makab-ot ang maong target ilabi na nga 35 na ang iyang pangedaron.

Gitataw usab sa aktres nga wala pa sila nagsugod sa preparasyon sa ilang kasal sanglit ilaha una nga gi-enjoy ang hugna sa ilang kinabuhi isip bag-ong engaged.

Segurado usab nga imbitado sa ilang kasal mao ang aktor nga si John Lloyd Cruz.

Gusto ni Bea ang intimate wedding  ug wala pa sila'y idea sa partikular nga lokasyon niini.

Melai nakahimamat kang Do Ji-han

Puwerting lipaya sa Kapamilya actress nga si Melai Cantiveros human niya nahimamat sa personal ang  Korean actor nga si Do Ji-han samtang nag-shoot siya sa iyang proyekto didto sa Korea .

"Guys my nakita akong nagjogging dtu sa set namin knina , @dojihan , very Oppaa and very mabait,see you soon Oppaaa Dojihan,the best  #maamchief #soon #thankyouLord," suma pa sa IG post ni Melai.

Nagpasalamat si Ji-han kang Melai sa mga maayong pulong nga nadawat niini gikan sa aktres. Nalakip si Ji-han kaniadto sa  hit series nga Hwarang: Thee Poet Warrior Youth niadtong 2016. Kabahin usab siya sa pelikulang  The Tower . —Sanden J. Anadia

Yves ug Gillian mag-MU na!

Giangkon nila ni  Yves Flores ug  Gillian Vicencio nga naa na sa mutual understanding (MU)  ang istado nila karon.

Daghan na ang nakabantay sa tam-is nga pagtinagdanay sa duha busa gipangutana gyud sila sa ilang istado.

Una na nga gibutyag sa duha nga malipayon sila sa usag-usa.

Ang duha maoy bida sa  digital series nga  “ReTox 2 Be Continued.” —Sanden J. Anadia

'Uhaw' parody ni Michael V gikagat

Gipistahan sa nagkadaiyang social networking sites ang Uhaw" parody ni Michael V nga "Oh Wow!"  Sa report sa GMA News , nahimout sa video ni Michael V mao ang  OPM group nga Dilaw nga maoy original nga nag-awit sa  "Uhaw," .

Gibutyag ni Michael V nga bilib siya sa kalamposan sa  bandang Dilaw nga nagikan  sa Baguio City. Pipila ka oras human gi-post ang maong parody, nakalangkat dayon kini og minilyon ka views.

Ai-Ai  gidedma og young star

Giangkon  ni Ai-Ai delas Alas nga dunay mga higayon nga wala siya tagda sa usa ka young star mga kauban niya sa set.

Matud pa sa aktres nga prangka gyud siya nga pagkatawo ilabi na kadtong dili managad. Gitambagan niya ang maong young star nga kinahanglan nga managad gyud kini ngadto kaniya. Sukad kaniadto, kusog na kaayo managad kaniya ang maong artista ,gani close na sila niini.

Nag-agi og civil wedding

Sa wala pa nahitabo ang  engrandeng kasal nila ni Maja Salvador ug Rambo Nuñez didto sa Bali, Indonesia niadtong Hulyo 31, 2023 , nag-agi na diay ang duha og  civil wedding niadtong Pebrero 14 karong tuiga . Si Taguig City Mayor Lani Cayetano maoy nag-officiate sa seremonya. Niabot lang sa 60 ang mga bisita sa ilang civil wedding.

Taping misikad na

Gisugdan na ang taping sa  upcoming primetime series nila ni  Donny Pangilinan ug  Belle Mariano nga Can't Buy Me Love. Nag-post og hulagway si Direk Mae Cruz sa Instagram kalabot sa kasikas sa maong proyekto.

ABS-CBN Ball

Banhawon karong tuiga ang  ABS-CBN Ball. Kahinumdoman nga nakapahuway ang maong kalihokan tungod sa pandemya . Wala pa hinoun gitino ang tataw nga petsa sa maong prestihiyosong kalihokan .