Ari-arian ni Teves, naka-freeze na
Matapos markahang terorista
MANILA, Philippines — Matapos ideklara bilang terorista, naglabas na ng freeze order ang Anti-Money Laundering Council (AMLC) sa mga ari-arian ni Negros Oriental Rep. Arnolfo Teves Jr. at iba pa.
Sinabi ni Atty. Luis Anthony Warren, sa isang press briefing sa Malakanyang, na nagpadala na sila ng abiso sa mga bangko para sa accounts ni Teves.
Bukod kay Teves, kasama rin sa freeze order ang iba pang nabanggit na indibidwal sa resolusyon ng Anti-Terrorism Council kabilang dito ang kanyang kapatid na si dating Negros Occidental Gov. Pryde Henry Teves.
Samantala, sinabi ni DOJ Asec. Atty. Mico Clavano na hindi pa rin maituturing na fugitive si Teves sa kabila ng designation sa kanya bilang terorista.
Paliwanag nito, kailangan kasing maisyuhan muna siya ng warrant of arrest na tanging korte ang maaaring mag-utos.
Sa panig ni National Security Council Asst. Dir Gen. Jonathan Malaya, binigyang diin nito na layon din ng pagdeklarang terorista kay Teves na matanggalan ng pangil ang grupo nito at matigil sa ginagawang pananakot sa Negros Oriental nang sa gayon ay maibalik na rin ang peace and order situation sa lalawigan.
“The properties and funds subject of the AMLC freeze order include those owned or controlled by the subject of the terrorist designation, whether owned or jointly owned or controlled by them, those derived or generated from funds of the subject of designation, or those under persns or entities acting on their behalf.
“So, upon the designation of an individual or organization, it is ministerial upon the part of the Anti-Money Laundering Council to issue an ex parte order to freeze without delay the assets of the subjects in this case. So, that’s all,” sinabi pa ni Warren.
Inaatasan din ang lahat ng sakop na institusyon nito at mga ahensiya ng gobyerno na magsumite sa AMLC ng written report sa mga kahinahinalang transactions at dating transaksyon sa loob ng limang araw na epektibo ang freeze order.
Nagbabala naman ang AMLC sa sinuman na makikipag transaksyon kay Teves at mga kasama nito ay mananagot sa ilalim ng batas. — Danilo Garcia
- Latest
