Agianan alang sa emerhensya tukoron sa Brgy Luz

CEBU, Philippines — Usa ka emergency portal kun agianan ang itukod sa Kapitolyo ug sa pribadong kompaniya alang sa mga residente nga namuyo sa luna nga gipanag-iya sa Kapitolyo diha sa barangay Luz dakbayan sa Sugbo.

Ang maong agianan anha ipahimutang sa luna nga gipanag-iya sa Kapitolyo nga anaa sa luyo nga bahin sa Pag-IBIG Fund Cebu office sa Cebu Business Park (CBP).

Sumala sa Capitol Information Office nga ang pagbuhat sa maong agi-anan maoy pagtabang sa mga residente sa maong dapit panahon kun adunay emergency.

Nunot niini usa ka memorandum of agreement ang gipirmahan ni Gobernador Gwendolyn Garcia ug mga abogado sa Ayala Land Inc. (ALI) nga sila si Dindo Fernando ug Grant Norihide Saito niadtong Agosto 1 alang sa pagtukod og gate sa may kural nga nag bulag sa luna sa Probinsya ug propedad sa Ayala sa maong dapit.

Makaagi sa maong portal o agi-anan ang mga tawo ug sakyanan sama sa fire trucks panahon kun adunay emergency.

Ubos sa kasabotan, ang ALI nga maoy developer sa CBP maoy mogasto sa konstruksyon sa gate sa area kun asa gapuyo ang mga residente sa Brgy Luz.

Nitambong sa pagpinirmahanay ang mga opisyal sa brgy Luz gipangulohan ni Kapitan Renato Labrador. (BANAT NEWS)