Aberin: Dakong accomplishment pagkompiska sa kinilong shabu

CEBU, Philippines — Gihulagway sa direktor sa Police Regional Office-7 Brigadier General Anthony Aberin nga usa ka dakong operational accomplishment ang pagkompiska sa kapolisan sa Dakbayan sa Talisay sa 5.5 kilo nga shabu sa niaging adlaw.

Napugngan sa kapolisan nga ma-apod-apod ang maong kinilong drugas nga nagkantidad og kapin P37 milyones ngadto sa nagkalain-laing bahin sa Central Visayas.

Matud ni Police Lieutenant Colonel Gerard Ace Pelare, tigpamaba sa PRO-7 nga subsob ang operasyon sa Talisay City Police Station batok sa ilegal nga drugas ug giingong adunay drug personalities nga gustong ibalik ang kaniadto nga sitwasyon.

Ang suspetsado nga si Robert Bonghanoy Fernan unang nitug-an nga anaa sa sulod sa jail facility ang iyang amo nga maoy tigsugo kaniya diin mao kini ang kasagarang isulti sa nga madakpan sa kapolisan sa ilang buy-bust operation.

Ang PRO-7 nagsusi aron masuta kong tinuod o dili ang pangangkon sa suspetsado.

Nakig-alayon ang kapolisan sa kadagkoan sa Bureau of Jail Management and Penology aron mailhan ang mga tawo nga giingong nalambigit sa ilegal nga kalihokan nga anaa sulod sa prisohan.

Sa laing bahin, mga dili lumolupyo sa Siyudad sa Lapu-Lapu ang kadaghanan  sa mga  nadakpan nga high value individual nga pusher.

Kini ang gipadayag ni  Police Coronel Elmer Lim, director  sa Lapu-Lapu City Police Office kinsa nagkanayon nga 98 porsento sa HVI nga ilang nadakpan gikan sa ubang mga dagkong siyudad ug dos porsento lang ang taga Siyudad sa Lapu-Lapu .

Matud ni Lim nga sukad sa niaging tuig kapin na sa P400 milyones ang balor sa shabu nga nasakmit sa kapolisan sa siyudad diin ang labing ulahing nadakpan niadtong niaging Sabado nga nakuhaan og kapin sa usa ka kilong shabu nga nibalor ngadto sa P7milyones.

Samtang kanhi drug surrenderee nasikop sa buy-bust operation sa Philippine Drug Enforcement Agency-7 uban ang Mandaue City Police Station 2 diha sa San Roque Street, Barangay Subangdako  sa maong dakbayan niadtong Martes sa gabii.

Ang nasikop mao si Ryan Flores, hingkod ang panuigon, nagtrabaho isip cook sa restaurant.

Nasakmit gikan sa suspetsado ang walo ka putos nga shabu nga nibalor ngadto sa P75 mil ug buy-bust money.  —Romeo T. Limpangog, Rowena D. Capistrano (BANAT NEWS)