Kasagaran nato buot gyud mosaulog sa mga mahinungdanong panghitabo sa atong kinabuhi sama sa birthday, anniversary ug mga mahinungdanong milestone sa kinabuhi. Apan kining maong pagsaulog mamahimong makahuloganon labina kun mahatagan kini og praktikal nga lihok kun mga lakang.
Sama pananglit sa mga batch reunions nga imbis kutob lang sa pag-inom ug paglingawlingaw mohimo og pagtabang sa mga anak sa mga kaubanan nga nagkinahanglan og tabang aron makatungha. Ang anibersaryo sa Parokya mamahimong masinati pinaagi sa paghimo og mga konkretong lakang pastoral aron pagtabang sa mga parokyano nga nagkinahanglan labina kadtong walay bunyag,kasal ug sa mga nangamatay nga makadawat sa mga libreng serbisyo.
Dako na kaayo kini og kahimoan. Dinhi sa amo sa Parokya gihimong libre ang misa kanila nga ilubong. Kun sakop ka sa jubilee card hatagan pud ka og lungon. Sa ginagmay nga paagi mamahimong dunay matampo ang Parokya.
Ang pagtuo nga walay buhat patay nga pagtuo. Uban ang makanunayong pag-ampo mamahimong possible ang tanan kun kinasingkasing ang atong tuyo. Kay sa wala pa nato malitok ang atong tumong, ang tanan mamahimong makahuloganon.
Sa katapusan, unta makita nato nga ang pagsaulog dunay kabilin nga ipatik aron matag tuig nga pagsaulog ato kining paabuton uban ang dakong kalipay ug paglaum.